gå rundt som eit tre
du skal få eit nytt namn på ein stein
eller på ein stokk
eit namn du kjenner
eller kjenner igjen då
men som ingen anar noko om no
no viser det ugripelege seg
ein kan ikkje halda vatn
eller sollys
fast i handa si
med mindre ein er eit tre eller ei planta
som veks med sola
og kastar skuggar på stokken
som ei skrift
i ei spegling som står stille
mens alt rører seg rundt det
eg ser mennesker
eg skimtar nokon som går rundt
og liknar tre
seier den blinde
som aldri har sett før
sjå teikn på meining
i det som lever
som ser gjennom deg
i ei spegling som rører seg
og set deg saman
gjennom eit tomrom